شسالفة الباب الدوار؟ وشنو فوايده؟

ليش ما يحطون باب عادي ويفكونا؟

أكثر شي نشوفه ينحط في مداخل العمارات أو الفنادق الكشخة أو مباني الشركات، إذا فكرت فيها حتى هالنوع من الأبواب ياخذ مساحة مالها داعي، وبطيء وثقيل ينرفز الواحد. قبل لا أكتب هالموضوع كنت افكر يحطونه بس حق الكشخه يعني مكان راقي، ومادري إذا سامعين الإشاعة انهم سووا هالبيبان عشان يمنعون الحصن من دخول المباني أيام اول، تفكيري السابق والإشاعة اثنينهم غلطططط 

شنو قصة اكتشاف الباب وشسالفته؟

يمكن الغالبية يبون يعرفون فوايد الباب ويخلصون، بس صدقوني قصة اكتشافه حلوة وتسوه طحت عليها بالصدفة وعجبتني.

الله يسلمكم اللي طلع بتصميم هالباب واحد نجري اسمه ثيوفيلس فان كانيل - Theophilus van Kannel من هو صغير ويكره بعض التقاليد الاجتماعية اللي مالها داعي، بالخصووووووص سالفة انك تفتح الباب حق الحريم كان دايما يقول شكو افتح الباب حق الحريم خلهم اهم يبطلونه ! أمه ابتلشت فيه كان يفشّلها بوايد مواقف، لما صار في يوم من الأيام كان عمره 12 سنة مصّخها على زيادة ولا تاخذه امه وتكشف مقعده جدام الناس وتطقه طقققققققققققق  مسكين تهزّأ جدام 37 أم وبنت، واااايد تأثر من هالموقف وتعقد من الموضوع أكثر.

والله عليه خوش شنب ها؟

مرت السنين ولا يتزوج وحده اسمها أبيجيل – Abigail، راح وياها شهر العسل على قمة أحد الجبال ولا يكتشف انها مو راضية تدش الباب، يقول لها دشي يا مره وخلصينا واهي مو راضية، شالسالفة؟ ولا تقول له ما ادش علما تفتح لي الباب! ولا يقعد يناجرها ساعة اهو معنّد وهي معنده، آخرتها اكتشف انها معقده مثله كانت ترفض انها تدش من أي باب إلا إذا زوجها أو ريّال يفتحه لها  لوووووووووووول! لااااا ومو بس لازم يفتح لها الباب، لازم يــعــزمها ويقول تفضلي بعد  سبحاااااان اللهههههه نــــصـــــــيــــــــــب!! الظاهر قبل لا يتزوجها كان يفتح لها الباب يعني ذرب بس لما صار شهر العسل عباله طاحت الميانه خلاص واكتشف العقده. صج مو قشمرة! يعني تزوج وحده معقده مثله بس عقدتها عكسه! ولما تزوجها ما كان يدري بهالشغلة واكتشفها بشهر العسل وقعد يناجرها جدام الناس

تأزّم ثيوفليس من هالوضعية وكان وايد يناجر مرته على هالموضوع بس ماكو فايده، يقولون كان هذا دافع قوي حق ثيوفيلس لاكتشاف الباب الدوّار.

شنو الفرق؟ هم لازم يعزم مرته انها تدش الباب!

لاع الفرق بهالباب ان الحريم ما كانوا يحبون يدشونه عشان لا يدزونه ثقيل، لازم ريال يدش يدزه عشان يتحرك الباب وهم بس يمرون وراه، جذي افتك من عزيمة مرته وكان يقدر يدش الباب ويخلص بدون ما يعزم احد ومرته تمشي وراه 

وصج بعد ما اكتشفه سنة 1888 أول 14 باب ركّبهم في بيته وحل مشكلته مع مرته، وكان متأمّل وايد انه يغيّر طريقة المجتمع وعزيمتهم للحريم لما يفتحون الباب.

بس بعد جم سنة شاف الناس صاروا يعزمون الحريم حتى على بابه وكان يضحك لما يشوف جذي ويقعد يتحلطم يقول ماكو فايدة من هالبشر 

سنة 1889 كرّم محافظ المدينة ثيوفيليس بميدالية لفايدة اختراعه الجهنّمي اللي حل وايد مشاكل.

شنو فوايد هالباب؟ وشنو المشاكل اللي حلها؟

السبب الرئيسي لاستخدامه اليوم هو كنوع من الحاجز الجوي بين داخل المبنى والطقس الخارجي – airlock، مثل باب الهوا اللي تكلمت عنه من جم شهر. الباب هذا يعزل مدخل المبنى عن الطقس الخارجي سواءاً كان حار ولا بارد، أكثر شي استفادوا منه بهالباب هو لناطحات السحاب، ناطحات السحاب فيها مشكلة باختلاف ضغط الهوا داخل المبنى وخارجه، فرق الضغط هذا يسبّب صعوبة فتح وإغلاق الباب العادي اللي تسحبه أو تدزه.

يمكن حاشكم موقف مرات ببعض المباني تحاول تفتح الباب ويكون مثل معلّق وينرفزك ، بعدين تدزه أو تسحبه حيل ومثل يتزحلق وتحس بهوا قوي يحوشك لما تفتحه، هذا هو اللي قاعد اقول عنه بالضبط.

طبعاً اكتشفوا هالباب ايام اول والتكنولوجيا ما كانت متطورة كفاية لاستخدام ابواب كهربائية أوتوماتيكية، الحين الباب الكهربائي اللي ينفتح عالجنب مع باب أو ستارة الهوا يحلون مشكلة عزل الطقس الخارجي وهم صعوبة فتح واغلاق الباب، بس طبعاً يستهلكون كهربا وايد اكثر من الباب الدوار اللي يشتغل على قوة الناس اللي يحركونه.

السبب الثاني هو يشتغل كعازل صوت حق الشوارع المزحومه وداخل صالة استقبال المبنى، من جذي بالأفلام الأجنبية تشوف يحطون شخصية بالشارع وخبصة وازعاج بس تدش صالة مبنى فيه باب دوّار يصير هدوء والصوت خفيف في الخلفية.

السبب الثالث يستخدمونه كنوع من الكشخة ولأسباب نفسية، مصممين الديكور يقولون لما واحد يدش من باب دوّار إلى صالة راح تتغيّر نفسيته بسرعة لما يمر بالمساحة الضيقة داخل الباب إلى مساحة الصالة ويسبب له نوع من الراحة والانبهار ، يخليه يحس كأن المكان راهي حيل حتى لو كان عادي مو كبير… يعني يقصون عليه وهو ما يدري 

تصاميم من نوع ثاني نشوفها لتأدية غرض عزل الطقس بالمداخل اللي تكون عبارة عن بابين ورا بعض -سواءاً كانوا كهربائيين ولا عاديين- وبينهم ممر صغير بس هالتصميم ياخذ مساحة أكبر مالها داعي.

فوائد ثانية للباب الدوار:

1- تنظيم حركة دخول وخروج الأشخاص من وإلى المبنى، بس هم مشكلة يبطّئ حركتهم شوي من جذي وايد تشوف يحطون يم الباب الدوار أبواب عادية بس مصكرينها لحالات الطوارئ بس، ويحطون حوالي اثنين إلى أربع أبواب لهالغرض. بسنة 1942 احترق ملهى ليلي ببوسطن ماستشيوستس وما كان عندهم إلا باب دوار، مات بسببه 503 أشخاص وبعدها صار لازم قانونيا وضع أبواب عادية يم الدوارة.

2- الهوا ما يقدر يحرّك الباب ويفتحه أو يدوره.

3- الغبار، المطر، الثلج ما يتسرب لداخل المبنى.

4- يوفّر سوالف الكلكجية اللي يعزمون “انت اول” و”تفضل” و”يمين يمين” المفروض يعني بس هم نشوفها موجودة لي اليوم.

معلومات سريعة عن الباب:

1- استغرق تطوير الباب 3 سنوات وكلّف 9,837 دولار أمريكي.

2- أول مرة استخدموا الباب -بعد تجربته ببيت ثيوفيلس طبعاً- كان لمطعم اسمه ريكتورز - Rector’s في مانهاتن، نيويورك وبالتحديد في الـTime Square.

3- لما صنع الباب اول فتره كان شعاره “دايما مصكّر” – “always closed” لأنه في أي حاله من الأحوال ما راح يكون في منفذ في الداخل متصل بالخارج بشكل مباشر أبد عبر الباب.

4- ثيوفيلس كان حاط بباله يستخدمون هالباب حتى في البيوت مو بس بالمباني والمطاعم 

5- الباب لازم يكون من زجاج عشان تشوف اذا في احد يبي يستخدمه من الصوب الثاني وتقدر تتنبأ بحركته.

6- يحطون بهالباب منظم حركة شوي ثقيل عشان لا يدور الباب بسرعة خطيرة أو يستعيل حركة اللي يستخدمون الباب، من جذي أول دزّه للباب تكون ثقيله بعدين يصير أخف بوايد، حتى هالأيام نشوفهم يحطون محرك كهربائي يحرك الباب بروحه أول ما تدخله.

7- صاحب الاختراع سوا شركة متخصصة بصناعة الأبواب الدوارة ولي اليوم موجودة، اسمها International Revolving Door Company.

8- في الدول اللي يسوقون سيارات في الحارة اللي عاليمين يكون المرور في الباب الدوار من الجهة اليمين، بس الدول اللي يسوقون فيها سيارات في الصوب الثاني عاليسار يكون العكس، مثل نيوزيلندا وأستراليا، بانجلترا تلقى مرة جذي ومرة جذي ماكو شي ثابت.

كنت أبي احط موضوع سريع بو فقرتين ولا القى روحي اكتب كل هذا

el m9dar:  kumail+